Çfarë bëri si duhet Zelanda e Re në luftën kundër Koronavirusit?

Pas pothuajse 5 javësh izolimi të rrept qytetarët e Zelandës të Re iu rikthyen kafesë dhe ushqimeve të shpejta. Zelanda e Re ka vendosur të ri-hap shkollat, por duke mundësuar dhe respektuar distancën sociale, të hapen bizneset të cila munden që shërbimet e tyre ti ofrojnë pa pasur kontakt fizik dhe të lejohet lëvizja e njerëzve. Megjithatë tubimet masive dhe evenimentet publike vazhdojnë të jenë të ndaluara. Zelanda e Re ka një popullsi prej rreth 5 milion banorësh, vendi ka regjistruar 1485 raste me COVID19 prej të cilave 20 kanë përfunduar me vdekje (03.05.2020 Worldmeter). Për disa ditë me radhë rastet e reja nuk arrijnë në më shumë se 9, gjë që bëri qeverinë të njoftojë se virusi është eliminuar në mënyrë efektive.

Suksesi i dukshëm i Zelandës së Re në përballimin e virusit i është atribuuar veprimeve të hershme dhe gjithëpërfshirëse.

Mbylli kufijtë

Zelanda e Re bëri disa nga kufizimet më të ashpra në botë për udhëtime dhe aktivitete që në 19 Mars. Kjo ndihmoi në ndalimin e rasteve të importuara nga jashtë – 33% e rasteve të Zelandës së Re u importuan. Siç tha kryeministrja Jacinda Ardern në atë kohë: “Ne kemi vetëm 102 raste, por kaq kishte dhe Italia fillimisht”.

“Nëse shikoni Australinë fqinje, dy të tretat e rasteve të saj vinin nga jashtë,” i tha BBC-së Prof Sanjaya Senanayake nga Universiteti Kombëtar Australian.

“Pra, ishte vërtet e rëndësishme mbyllja e kufinjve.”

Bëri një izolim të shpejtë dhe të qartë

Më 21 mars, Zelanda e Re prezantoi një sistem të ri të paralajmërimit publik me katër nivele – më i larti ishte izolimi i plotë kombëtar dhe më i ulëti që tregon se sëmundja ishte e përmbajtur, por njerëzit duhet të ishin të përgatitur.

Shteti hyri në nivelin e dytë, që do të thoshte se kishte një rrezik në rritje të transmetimit të virusit në komunitet. Disa ditë më vonë, vendi u zhvendos në nivelin katër.

Zyrat, shkollat ​​dhe hapësirat publike si plazhet dhe sheshet e lojërave ishin mbyllur. Baret dhe restorantet gjithashtu ishin të mbyllura – përfshirë dhe “delivery”.

Gjurmoi dhe testoi

Ministria e Shëndetësisë tha se 80% e kontakteve të ngushta të personave të konfirmuar me virusin tani janë të paralajmëruar brenda 48 orëve nga diagnostikimi.

Kjo do të thotë që ata njerëz mund të izolohen derisa të kalojë periudha e inkubacionit, dhe mund të testohen. Zyrtarët thonë se 8,000 njerëz po testohen çdo ditë.

Ka pasur disa kritika, se gjurmimi i kontaktit duhet të zgjerohet edhe më shumë nëse do të vazhdojë të jetë i efektshëm.

Njerëzit gjithashtu nxiten të mbajnë një ditar të njerëzve me të cilët bashkëveprojnë, dhe Zelanda e Re po punon gjithashtu në një aplikacion për gjetjen e kontakteve, të ngjashme me ato në përdorim në Singapor dhe Australi.

Mesazhe të qarta publike

Qeveria gjithashtu është lavdëruar për qartësinë e mesazheve të saj gjatë gjithë krizës, veçanërisht Znj. Ardern dhe Dr Bloomfield.

“Unë mendoj se kur dëgjon kryeministren që jep informacione sensitive në mënyrë të qetë, kjo gjithashtu ju ndihmon të ndjeheni të qetë”, tha Prof Senanayake.

Por ai paralajmëroi kundër heqjes së kufizimeve shumë herët, duke thënë se njerëzit prapë duhet të “mbeten vigjilentë”.

“Mënyra e vetme për ta bërë këtë është të vazhdosh mbikëqyrjen dhe testimin e zgjeruar. Sot kufizimet kanë rënë, por nëse rastet rriten, duhet të konsiderohet kthimi i kufizimeve. Është diçka për të cilën duhet të jesh vigjilent”.